| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 59.101 | Dem. 59.104 (English) | >>Dem. 59.106 |
59.103ἐπεὶ δʼ ἀπειρήκεσαν οἱ Πλαταιεῖς καὶ ἐνδεεῖς ἦσαν ἁπάντων καὶ ἠποροῦντο τῆς σωτηρίας , διακληρωσάμενοι πρὸς σφᾶς αὐτοὺς οἱ μὲν ὑπομείναντες ἐπολιορκοῦντο , οἱ δὲ τηρήσαντες νύκτα καὶ ὕδωρ καὶ ἄνεμον πολύν , ἐξελθόντες ἐκ τῆς πόλεως καὶ ὑπερβάντες τὸ περιτείχισμα τῶν πολεμίων λαθόντες τὴν στρατιάν , ἀποσφάξαντες τοὺς φύλακας διασῴζονται δεῦρο , δεινῶς διακείμενοι καὶ ἀπροσδοκήτως · οἱ δʼ ὑπομείναντες αὐτῶν ἁλούσης τῆς πόλεως κατὰ κράτος ἀπεσφάγησαν πάντες οἱ ἡβῶντες , παῖδες δὲ καὶ γυναῖκες ἐξηνδραποδίσθησαν , ὅσοι μὴ αἰσθόμενοι ἐπιόντας τοὺς Λακεδαιμονίους ὑπεξῆλθον Ἀθήναζε .
59.104τοῖς οὖν οὕτω φανερῶς ἐνδεδειγμένοις τὴν εὔνοιαν τῷ δήμῳ , καὶ προεμένοις ἅπαντα τὰ αὑτῶν καὶ παῖδας καὶ γυναῖκας , πάλιν σκοπεῖτε πῶς μετέδοτε τῆς πολιτείας . ἐκ γὰρ τῶν ψηφισμάτων τῶν ὑμετέρων καταφανὴς πᾶσιν ἔσται ὁ νόμος , καὶ γνώσεσθʼ ὅτι ἀληθῆ λέγω . καί μοι λαβὲ τὸ ψήφισμα τοῦτο καὶ ἀνάγνωθι αὐτοῖς .
Ψήφισμα περὶ Πλαταιέων
Ἱπποκράτης εἶπεν ,Πλαταιέας εἶναι Ἀθηναίους ἀπὸ τῆσδε τῆς ἡμέρας ,ἐπιτίμους καθάπερ οἱ ἄλλοι Ἀθηναῖοι ,καὶ μετεῖναι αὐτοῖς ὧνπερ Ἀθηναίοις μέτεστι πάντων ,καὶ ἱερῶν καὶ ὁσίων ,πλὴν εἴ τις ἱερωσύνη ἢ τελετή ἐστιν ἐκ γένους ,μηδὲ τῶν ἐννέα ἀρχόντων ,τοῖς δʼ ἐκ τούτων .κατανεῖμαι δὲ τοὺς Πλαταιέας εἰς τοὺς δήμους καὶ τὰς φυλάς .ἐπειδὰν δὲ νεμηθῶσι ,μὴ ἐξέστω ἔτι Ἀθηναίῳ μηδενὶ γίγνεσθαι Πλαταιέων ,μὴ εὑρομένῳ παρὰ τοῦ δήμου τοῦ Ἀθηναίων .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 59.101 | Dem. 59.104 (English) | >>Dem. 59.106 |
